سنڌي شعبو، سنڌ يونيورسٽيءَ جي اوائلي ۽ ابتدائي شعبن مان هڪ آهي، جنهن جو بنياد نامور عالم علامه آءِ.آءِ قاضي صاحب جي وائيس چانسلر شپ واري دور ۾ 1952ع ڌاري پيو. ابتدا ۾ هي شعبو ايلسا قاضي اولڊ ڪئمپس حيدرآباد ۾ قائم هيو، جنهن کي 1971ع ڌاري علامه آءِ آءِ قاضي ڪئمپس ڄام شوري منتقل ڪيو ويو. نامور عالم ۽ محقق ڊاڪٽر نبي بخش خان بلوچ شعبي جو پهريون انچارج چيئرمئن مقرر ٿيو. ان بعد هن وقت تائين شعبي ۾21 چيئرپرسن مقرر ٿي چڪا آهن.

تعليمي حوالي سان شعبي ۾ چئن سالن وارو بي ايس پروگرام، ايم.اي، ايم.فل ۽ پي ايڇ ڊي جا پروگرام هلندڙ آهن. تعليم سان گڏ تحقيق جي ڏس ۾ پڻ سنڌي شعبي سنڌ يونيورستيءَ جو بيحد معياري، مثالي ۽ شاندار سفر جا اهڃاڻ ملن ٿا. هن وقت تائين شعبي مان 100 جي لڳ ڀڳ پي ايڇ ڊي ۽ اٽڪل ايترا ئي ايم.فل جا اسڪالر پنهنجون ڊگريون حاصل ڪري چڪا آهن. بي شمار اسڪالر هن وقت به مختلف علمي موضوعن تي تحقيق ۾ مشغول آهن. شعبي ۾ موجود سمورا استاد پي ايڇ ڊي ۽ نامور محقق، اسڪالر ۽ ڪيترن ئي ڪتابن جا مصنف آهن. شعبي پاران عالمي ڪانفرنس، شاعريءَ جو ميلو، سيمينار، ورڪشاپ، ريفرنس ٿي چڪا آهن. جڏهن ته هي شعبو مستقل طور علمي ادبي سرگرمين جي حوالي سان متحرڪ رهندو اچي ٿو. شعبي ۾ قائم “شاهه لطيف سيل” پاران لطيفيات ۽ ڪلاسيڪل شاعريءَ جي موضوع تي ڪيترا ئي ليڪچر ۽ مباحثا منعقد ٿيندا رهيا آهن، جيڪي ڪتابي صورت ۾ پڻ ڇپيل آهن. جڏهن ته شعبي جي ابتدا کان وٺي مختلف دورن ۾ ادبي مخزن جهڙوڪ سوغات، سوکڙي، پورب ۽ تحقيقي جرنل ڪينجهر شايد ٿيندا پئي ٿيا آهن. شعبي جي استادن پاران شاگردن جي ذهني ۽ ادبي تربيت لاءِ 80ع واري ڏهاڪي ۾ ‘لاٽ ادبي فورم’ جي نالي سان فورم جوڙيو ويو هيو، جنهن سالن تائين نون اديبن ۽ شاگردن جي تربيت ڪئي. هن وقت اسٽڊي سرڪل جي نالي سان شاگردن جي ذهني آبياري لاءِ هڪ فورم قائم آهي، جنهن پاران “ادبي منظر” جي نالي سان هڪ ادبي مئگزين پڻ شايع ڪيو وڃي ٿو.